Radio Sele ye la radio d’Asturies pionera n’emisión en llingua asturiana. Los primeros programes entamaron a emitise en febreru de 1986, realizando la emisión dafechu n’asturianu. Anguaño tenemos difícil retu: la plena normalización de la llingua. L’enfotu, trabayu y procuru polo que consideramos un drechu fundamental de les persones son los sofitos que nos guiaron tou esti tiempu nesta xera. Munches fueron les persones que pasaron pelos estudios de Radio Sele, abondos los momentos prestosos y asgaya los oyentes que se comunicaron con nós. Pasu ente pasu, Radio Sele foi medrando como radio llibre hasta algamar nel añu 1999 la llicencia comercial que va permitir afrontar esti retu d’un mou más profesional y satisfactoriu. La nuesa emisora aporta a les principales ciudaes d’Asturies, como son Uviéu, Xixón, Avilés, La Pola (Siero), Mieres, Llangréu, ... con una población total d’unes 800.000 persones. La dignidá, autoestima y reafirmación de les señes d’identidá de los pueblos son la garantía de la pluralidá y respetu universales. Poro, Radio Sele creye qu’a Asturies prúye-y una radio que fale la so llingua pa garantizar estos drechos universales y fundamentales y por ser, amás, el principal valor de la cultura d’un país.